بحكيلكم قصة حقيقية صارت معنا من كم سنة وفكرنا نرسلها لطاش بس
مدري ليش هونا السالفة انا كنا مرة في البر والجو سحاب يهبل وينذر  بالسيل  ومستانسين  وماعندنا من الشيطان طاري وفجأة سمعنا بنت أخوي تصارخ تراكضنا لقيناها ماسكة ساقها ولا ذاك الجرح اللي شاق  ساقها نصين ارتعنا كلنا وما عاد عرفنا اشلون نتصرف عاد بر وخلا وماعندنا من يذكر الله اللي يقول اربطوه بغترة واللي يقول اكووها والبنت قاعدة تنزف لين خاف ابوها يصفى دمها قام قال مشينا للبيت وانا  بروح بها للاسعاف ومامعنا رجال الا هو وابوي اللي مايسوق وولد اخوي توه في المتوسط ولا فيه الا سيارة وحدة واحنا جيش وش يضف
عفوشنا وش يطفي نارنا اللي قاعد يطبخ عليها غدانا ... المهم ويلعب علينا إبليس ونحزن ونقول مناب رايحين نترك هالجو الزين ونرد البيت مير معصي  وأخوي ضعيف قلبه مع بنته ولا حريم مين يطاوعهم والغيم اسود بس عاد السلطة ..... ـ
شوي ويشغل ويروح ببنته للاسعاف وهي مايحتاج شوي وتغفل علينا ... ويوم اختفت السيارة وتنغزنا قلوبنا وش هذا اللي سويناه نقعد في الخلا بدون سيارة ولا وبعد غيم  ونذكر الله ونقول اللي كاتبه الله بيصير ... ونقعد نتقهوى ونسولف وكنا مانشوف شي .... والله ماامدانا نص ساعة من راح اخوي ويجينا ذاك الهواء اللي بغى يطير قدرنا الله لايعيده ماقعدنا الا بسبته مير ونقوم نتنافض ونوجس خيفة من ذا الهواء والله وتفتح السماء ابوابها وتقوم موب تمطر هذي كانت تكب كب  والله سوينا مثل اللاجئين الله يأمنا في اوطاننا حطينا زوليتنا فوق روسنا واندسينا تحتها بزعمنا بترد المطر عنا وهي زوليه خفيفة الله
يخلف علينا مير  حنا كان ظننا رش بسيط ويوقف والله مير وتصمل وتخمر الزولية وإحنا نتراجف تحتها اربع بنات اميمتي وابيي الشايب وعيال اخوي ومعنا بعد وخيتي وبزرانها توهم صغار مير وينهبلون البزارين مير واحد منهم انهار قام يصرخ من غير رايه وانا مدري اسكته ولا اضحك على شكله وأنا كل ظني انه الحين
بيوقف والله مافيه أمل الا كل ماله يزيد ايه وش على بالكم ربي وامرها مير ونحس انا خمرنا من تحت اكثر من فوق واقوم ارفع الغطاء الجوي اللي احنا تحته والا وش اشوف ؟ أثرنا جالسين في مجرى  السيل وساعتها بس حسيت ان الدعوى صدق وانا تورطنا مير واقوم اصرخ قوموا قوموا قبل لا يشيلنا السيل ونقوم نتراكض ومدري وين على بالنا بنروح خلا خالي ورب عالي والله قلنا مايردنا الا السكة ونضف بزرانا وشيابنا ونطقها مشي للشارع واشوا كن ربي عارفن النيه كنا جالسين قريب من الاسفلت ومير ولا فاتني قبل لا نرحل عن مضاربنا اني القي نظرة حزينة على قدرنا وناره طفت من السيل ومابقى الا دخنتها  ومير ربي يقوينا ونوصل للشارع وماتتخيلون نأشر للسيارات ومافيه واحد فيه خير فكر حتى يهدي عشان يشوف وش السالفة واحنا معنا شيبان وبزران   ... ايه يمكن خافو على سيايرهم لا تتوصخ .... صدق ماعاد في الدنيا خير .. والله كنا شوي وننهبل درجة الحرارة مرة انخفضت واحنا كنا بعز الشتاء ومع البلل ماعاد
صرنا نحس لا بيدين ولا برجلين وواقفين على السكة ناشر شكلنا يصعب على الكافر والله ساعتها قعدت ادعي من قلبي اللهم امنا  في اوطاننا وتذكرت اخوان لنا في هالدنيا يطردون من بيوتهم ولا حتى احد يفكر فيهم يادون عاد ينقذهم ... عاد تصدقون مين انقذنا ..... يعني ابدا مااظن يخطر على بالكم ...زهاه
مين . لا هذولي مكبرين الوسايد غيرهم ...ـ


هاه


فكروا


مو قلتلكم ماراح يخطر على بالكم



اللي انقذنا


هي


سيارة ايس كريم


والله العظيم اني صادقة  الهندي حق السيارة استغرب شكلنا مدري يبينا نشتري وانا مناب في حاله المهم انه وقف والله انه  هندي نشمي قام يتقطع الا ان نركب في السيارة عن المطر عاد كنا محتاجين عزيمة اصلا ماصدقنا نلقى احد يوقف لنا المهم والله ونتراص وسط هالسيارة وبزارين يتصايحون وابوي يكح من البرد وحنا ....
حدث ولا حرج يوم حسيت بالامان شوي وافطن لنفسي واقول وش فيه هالهندي مطير عيونه فينا واقوم اناظرنا لينا الله لا شماته ولا وحدة فينا متغطيه اصلا عبينا راحت مع اخوي بالسيارة ولو انا دارين بكل هالي بيصير كان رحنا معها المهم شوي و اشد طرحتي وأتغطى واقعد اكركر انا واخواتي واحنا والله خانقتنا العبرة شوي يوم حسو البزران بالدفا  قامو يتلفتون داخل السيارة وطبعا سيارة ايس كريم وما أدراكم ماسيارة الايس كريم والله شكلها مرة غريب من جوا ما
كنت اتخيلها كذا مرة واسعة والله في ذيك الساعة هالقرنبع يسوى عندنا قصر مو بيت بس عشان حسينا إن فيه سقف على رؤوسنا
المهم ان البزارين طاحو على كنز علي بابا شوي ويهجمون على البضاعة اللي في السيارة بلاهم ذابحهم الجوع والروعة وقاموا يوزعون على بعض البسكوت حق الايس كريم والله اشكالهم تكسر الخاطر حتى الهندي خنقته العبرة وقال خلوهم يأخذون اللي يبون أنا داريه انه يطبخ من جوا بس الرجال والله مجامل المهم ويجي وخيي بعد انتظارنا له لمدة ثلاث ساعات منها ساعتين تقريبا في الخلا والله كانت تجربة مروعة لا تنسى واعتقد إنها لازالت مؤثرة في نفوس الأطفال خصوصا   وشوي تمر السيارة بجنبنا وتروح واحنا نخابط عليها نبيه ينتبه لنا عشان مايروح للمكان اللي كنا فيه ومايلقانا وينهبل عاد تكمل وتصير روحة منحوسة صدق  انا والله شايفة ابو جيرانا عيونه باغيتن تنط من راسه وهو يشوفنا نحمل عاد الحين من وين نجيبه عشان ناخذ غساله واشوا  الهندي طلع نبيه مو اقولكم نشمي قام يضرب بالبوري وينتبه اخوي وجاء يسأله وش السالفة شوي ونتناقز كلنا من السيارة بوجهه  ويرتاع وخيي ويقول وش مركبكم هنا  قلناله اييييه ماتدري وش شفنا من يوم رحت عاد وعودنا للبيت والحمد لله بدون اي اصابات او خسائر في الارواح بس للاسف كان فيه خسائر في الممتلكات لان اخوي ابى ان يحمل الزوليه الفدلئية التي حمتنا قدر استطاعتها اول النكبه لانها طبعا خامرة مويه وطين والله حنا كان ودنا نحط  لها نصب تذكاري في بيتنا بس عاد يالله انا داريه اني طولت عليكم وودي اطول اكثر بعد بس عاد خلاص عورتني يدي
وهذي الحادثة رغم كل الرعب اللي حسينا فيه ساعتها الا انننا نضحك  لين تمزع كبودنا لي ذكرناه وذكرنا شكل كل فرد منا فيها صغار ولا كبار 
ومع السلامة

امــل

^{أرسل رسالة فوريه لأصدقائك من هنا}

^{الموقع الرئيسي}

^{إضغط هـنا للمشاركة}